ಕವಿಯೊಬ್ಬನ ಮುಗ್ಗಟ್ಟು

ವಿಪ್ಲವಗಳಲ್ಲಿ ಪ್ರತಿಮೆಗಳ ಹುಡುಕುವೆ ನಾನು-
ಮೊನ್ನೆ ಮುರಿದ ಮೂಳೆ, ನೆನ್ನೆ ಹರಿದ ನೆತ್ತರು,
ಇಂದು ಒಡೆದ ತಲೆ, ಈಗ ಹೋದ ಪ್ರಾಣಕ್ಕಿಂತ
ಸಾರ್ವಕಾಲಿಕ ಪ್ರತಿಮೆಗಳ ಶೋಧದಲ್ಲಿ ತೊಡಗಿರುವೆ,
ಡಿಸ್ಟರ್ಬ್ ಮಾಡಬೇಡಿ ಜನಗಳೇ, ದಯವಿಟ್ಟು!

ನನ್ನ ಪದ್ಯದ ಸಾಲುಗಳಲ್ಲಿ ಮೂಡುವ ರೂಪಕಮಾಲೆಯನ್ನು
ತೊಟ್ಟು ಮುಲುಗುತ್ತವೆ ನನ್ನ ಮುಗ್ಗಟ್ಟು
ಸೂಕ್ಷ್ಮ ಸಂವೇದನೆಯ ಕವಿಗೆ ಮಾತ್ರ ತಿಳಿಯುವ ಗುಟ್ಟು-
ಮರೆಯಬೇಡಿ ರಸಿಕರೇ, ದಯವಿಟ್ಟು.

ಸುಲಭ ಸಾಧ್ಯದ ತುಡಿತವೆಲ್ಲಾ ನಿಷಿದ್ಧ ನನಗೆ;
ದಟ್ಟವಾಗಿ ಅಡರಿಕೊಳ್ಳುವ ಮುಳ್ಳುಬೇಲಿ
ಮೈಗೆ ಸವರದ ಹಾಗೆ ನುಣುಚುವ ಸೃಜನಾತ್ಮಕ ನಡೆ
ನಡೆದು ಸವೆಸಬೇಕಲ್ಲ ದಾರಿ ಬಲು ಕಷ್ಟ,
ತಿಳಿದುಕೊಳ್ಳಿ ಸಹೃದಯರೇ, ದಯವಿಟ್ಟು.

ಕಳವಳದ ಬೀದಿ ಪ್ರತಿಭಟನೆಯೇನು;
ಬೆಚ್ಚನೆಯ ಕನಸಲ್ಲಿ ಹನಿಯುವ ರಕ್ತ, ಎರಗುವ‌ ಪೆಟ್ಟು
ಕಲಕುತ್ತವೆ ನನ್ನನ್ನು ನೂರ್ಪಟ್ಟು,
ಅರಿತುಕೊಳ್ಳಿ ನನ್ನಂತಹ ಕವಿಗಳ ಸಂಕಷ್ಟವದು,
ಚಿಂತನಶೀಲರೇ, ದಯವಿಟ್ಟು.

ಮರಗಟ್ಟದಿರಲಿ ಮನಸು

 

(ಶಹೀನ್ ಬಾಗ್ ಮಹಿಳೆಯರಲ್ಲಿ ಒಂದು ನಿವೇದನೆ)
ಹರಿವನದಿ ನೀರನ್ನು ಬೇರ್ಪಡಿಸಬಹುದೆಂದು
ತೊಡೆತಟ್ಟಿ  ಬರುತಾರೆ, ಎದೆನುಡಿಯ ನುಡಿದುಬಿಡಿ ಮರಗಟ್ಟದಿರಲಿ ಮನಸು
ಆಕಾಶಕಡ್ಡಗೆರೆ ಎಳೆದೆರಡು ನಭವೆಂದು
ಎದೆತಟ್ಟಿ ಬರುತಾರೆ, ಒಳನುಡಿಯ ನುಡಿದುಬಿಡಿ ಮರಗಟ್ಟದಿರಲಿ ಮನಸು
ಸರ್ವಭವ್ಯದ ಮುಂದೆ ತಮ್ಮಭವ್ಯವನಿಟ್ಟು
ಕದನಕಿಳಿಯುತ್ತಾರೆ, ಹದದ ನುಡಿ ನುಡಿದುಬಿಡಿ ಮರಗಟ್ಟದಿರಲಿ ಮನಸು
ಮನಸೊಳಗೆ  ಬರೆಎಳೆದು ಮತ್ತೆ ಹುಣ್ಣನು ಕೆದಕಿ
ಜೈರಾಮ ಎನುತಾರೆ, ಸನ್ಮತಿಯ ಹೂವನಿಡಿ ಮರಗಟ್ಟದಿರಲಿ ಮನಸು
ನೊಂದವರ ಹೆಗಲನ್ನು ಕೆಳಕದುಮಬಹುದೆಂದು
ಬಂದವರ ಕಣ್ಮುಂದೆ, ತಡೆಗಟ್ಟಿ ನಿಂತುಬಿಡಿ ಮರಗಟ್ಟದಿರಲಿ ಮನಸು
ಮನಸು ಮರಗಟ್ಟಿಸಲು ಕನಸು ಸುಟ್ಟರಗಿಸಲು
ಬರುತಾರೆ, ಬರುತಾರೆ, ಮನ ತೆರೆದು ಕುಳಿತುಬಿಡಿ ಮರಗಟ್ಟದಿರಲಿ ಮನಸು
(PC : Collage of newspaper images)

ನವನಾಗರೀಕತೆಯ ಕೊಲಾಜು

ಟಿಪ್ಪೂ ಸುಲ್ತಾನ್ ಎಂಬ ಹದಿನೆಂಟನೇ ಶತಮಾನದ ದೊರೆಯೂ, ಏರ್ಪೋರ್ಟಿನ ನಾಮಧೇಯವೂ, ಮೈನಾರಿಟೀ ಮುಸ್ಲೀಮರ ಓಲೈಕೆಯೂ, ಕೆಂಪೇಗೌಡನೆಂಬ ಪಾಳೆಯಗಾರನೂ, ನ್ಯೂಸೌತ್‌ವೇಲಿನ ಪಾರ್ಲಿಮೆಂಟಿನಲ್ಲಿ ದೀಪಾವಳಿಯೂ ಒಂದಕ್ಕೊಂಡು ಕೊಂಡಿ ಬೆಸೆದುಕೊಂಡು ‘ನವನಾಗರೀಕತೆ’ಯ ಪ್ರತೀಕವೆಂಬಂತೆ ಗುಡ್ಡೆಯಾಗಿ ಎದುರಿಗೆ ಬಿದ್ದಿದೆ.

tsultanಅಶೋಕನಿಂದ ಹಿಡಿದು ಭಾರತೀಯ ರಾಜರಲ್ಲಿ ಎಷ್ಟೆಷ್ಟು ಪಾಲು ಸದ್ಗುಣ ದುರ್ಗುಣ ಬೆರೆತಿದೆ ಎಂಬ ಜಗಳದಲ್ಲಿ ಟೈಮ್‌ಪಾಸ್ ಸುಲಭ. ಅಂದಿನ ರಾಜರಂತೆ ನಡೆದುಕೊಳ್ಳುವ ಡೆಮಾಕ್ರಸಿಯ ಇಂದಿನ ದೊರೆಗಳ ಬಿಸಿತುಪ್ಪದಂತಹ ಅಹಂಕಾರವನ್ನು ಬೆಣ್ಣೆಯಂತೆ ನುಂಗುವುದೂ ಕೂಡ. ಪ್ರಶ್ನಿಸದೇ ಬಿಟ್ಟರೆ, ಉತ್ತರದ ನಿರೀಕ್ಷೆಯೂ ಇಲ್ಲ, ದಾರಿ ಸುಗಮ.

ಏರ್ಪೋಟಿನಂತ ಹೊಸ ತಾಂತ್ರಿಕ ಆವಿಷ್ಕಾರಕ್ಕೆ ಮಧ್ಯಯುಗೀನ ಹೆಸರುಗಳೇ ಹೊಳೆಯುವ ಮನಸ್ಸಿಗೆ ನಮ್ಮ ದೇಶದ ಮೊದಲ ಪೈಲೆಟ್ಟಿನ ಹೆಸರು ಹೊಳೆಯುವದಿಲ್ಲವಲ್ಲ! ಅಷ್ಟೇ ಯಾಕೆ ನಮ್ಮ ಮೊದಲ ಮಹಿಳಾ ಪೈಲೆಟ್ಟಿನ ಹೆಸರು ಇಟ್ಟಿದ್ದಿದ್ದರೆ ಇಂದಿನ ಹೆಣ್ಣು ಮಕ್ಕಳಿಗೆ, ಮುಂದಿನ ಜನಾಂಗಕ್ಕೆ ಅದೆಂತಹ ಬಳುವಳಿಯಾಗಬಹುದಿತ್ತಲ್ಲ…!

airportಬಲಿ ಮತ್ತೆ ಬಾ ಎಂದು ಹಾಡುವ, ಬಲಿರಾಜ್ಯದ ಹೊನ್ನನ್ನು ನೆನೆಯುವ ಸಂತತಿಯವರೂ ಬಲಿಯ ಕೊಲೆಯನ್ನು ಸಂಭ್ರಮಿಸುವ ದೀಪ ಸ್ಪೋಟದಲ್ಲಿ ಮುಳುಗಿರುವುದು ವ್ಯಂಗ್ಯವೋ, ಬೆಳವಣಿಗೆಯೋ, ಜಾಣ ಅಪಸ್ಮಾರವೋ? ಹ್ಯಾಪಿ ದಿವಾಳಿ ಎಂದು ಅನ್ನಿಸಿಕೊಳ್ಳುವಾಗ ಸಿಟ್ಟಿಗೇಳಬೇಕೋ, ಮುಜುಗರದ ನಗುವಿನಲ್ಲೇ ಮಾತು ಮುಗಿಸಬೇಕೋ? ಇದು ದುರ್ಗಮ…!

ಟಿಪ್ಪೂ ಸುಲ್ತಾನನ ಹುಟ್ಟುಹಬ್ಬದ ಅವಕಾಶವಾದೀ ಘೋಷಣೆಯ ತಂತ್ರಗಾರಿಕೆ ಹಾಗು ಸಣ್ಣತನ ದಂಗುಬಡಿಸುವ ನಡುವೆಯೂ ಮುಸ್ಲಿಮರ ಅಪೀಸ್‌ಮೆಂಟೆಂಬ ಹಳಸುವಾದಕ್ಕೆ ಇನ್ನೂ ಕಾಲಿನ ಶಕ್ತಿ ಕುಂದಿಲ್ಲ ಎಂದು ಆಶ್ಚರ್ಯವಾಗುತ್ತದೆ. ಒಂದೆಡೆ ತಂತ್ರಗಾರಿಕೆಯೂ, ಮತ್ತೊಂದೆಡೆ ಓಲೈಕೆ ಎಂದು ತೊಳಲಾಡುವುದೂ ಚಲಾವಣೆಗೆ ಬರದ ನಾಣ್ಯದ ಎರಡು ಮುಖಗಳಷ್ಟೆ! ಅಷ್ಟೆಯೆ…?

sydneydiwaliಓಬಾಮಾನಿಂದ ಹಿಡಿದು ಹೊಸಕಾಲದ ನೇತಾರರೆಲ್ಲಾ ದೀಪಾವಳಿಯ ನೆರಳಿನಲ್ಲಿ ನಗುವುದು ಓಲೈಕಯಲ್ಲ, ಅಪೀಸ್‌ಮೆಂಟಲ್ಲ ಎಂದು ವಾದಿಸೋಣವೆ? ಸಿಡ್ನಿಯಲ್ಲಿರುವ ರಾಜ್ಯದ ಪಾರ್ಲಿಮೆಂಟಿಗೆ ದೀಪಾವಳಿಯಂದು ದೀಪದ ತೋರಣ ಕಟ್ಟಿದಾಗ ಬೀಗುವುದೆ? ಅದು ಓಟಿಗಾಗಿ ಎರಡೂ ಪಕ್ಷಗಳು ನಡೆಸಿಕೊಂಡು ಬಂದಿರುವ ಓಲೈಕೆಯಲ್ಲವೆ, ಅಪೀಸ್‌ಮೆಂಟಲ್ಲವೆ? ಹೌದಾದರೆ ಅದಕ್ಕೆ ಬಲಿಯಾಗುವಷ್ಟು ಬುದ್ಧಿಮಂಕರೇ ನಾವು? ಅವರು ಹಾಗೆಂದುಕೊಂಡಿದ್ದಾರೆಂದಾದರೆ ಸಿಟ್ಟಿಗೇಳಬೇಕಲ್ಲವೆ ನಾವು?

ಸಾಹಿತಿಯೋರ್ವನ ಅನಿಸಿಕೆ ಸಮಾಜದ ಶಾಂತಿ ಕದಡುತ್ತದೆ, ನಮ್ಮನ್ನು ಕಂಗೆಡಿಸುತ್ತದೆ. ಸಾಹಿತಿಯ ಮಾತು ಅಸಂಬದ್ಧವೋ-ಸುಸಂಬದ್ಧವೋ ಎಂಬುದಕ್ಕಿಂತ ಹೆಚ್ಚಾಗಿ, ಶಾಂತಿ ಕದಡಿಕೊಂಡು ಹೊಡೆದಾಡುವ ನೆಲೆಯಿಂದ ಮೇಲೇಳದ ಸಮಾಜ ನಮ್ಮನ್ನು ಕಂಗೆಡಿಸಬೇಕಲ್ಲವೆ? ಅಸಂಬದ್ಧವೆಂದಾದರೆ, ಅಂತ ಮಾತಿಗೆಲ್ಲ ಕೆಂಪೇಗೌಡ, ಟಿಪ್ಪೂಸುಲ್ತಾನರಂತೆ ಕತ್ತಿಹಿರಿದು ಕೊಲೆಗಿಳಿಯುವ ನಾವೆಂತ ಸುಸಂಸ್ಕೃತ ಮಂದಿ, ಸಮಾಜ, ದೇಶ…?

ಎಲ್ಲರಿಗೂ ದೀಪಾವಳಿಯ ಶುಭ ಸಂತಾಪ – ಒಪ್ಪಿಸಿಕೊಳ್ಳಿ.

ಯಾರು ಹಿತವರು ನಿನಗೆ…

ಇದೀಗ ಸೆಪ್ಟೆಂಬರ್ ಏಳರಂದು ಆಸ್ಟ್ರೇಲಿಯಾದಲ್ಲಿ ಫೆಡರಲ್ ಚುನಾವಣೆ. ಬರುವ ವರ್ಷ ಭಾರತದಲ್ಲಿ ನಡೆಯಲಿದೆ. ಈ ಹೊತ್ತಿನಲ್ಲಿ ರಾಜಕೀಯ ಪ್ರಕ್ರಿಯೆಯ ಬಗ್ಗೆ ಒಂದೆರಡು ಯೋಚನೆಗಳನ್ನು ಇಲ್ಲಿ ಟಿಪ್ಪಣಿ ಮಾಡಿಕೊಳ್ಳುತ್ತಿದ್ದೇನೆ.

ಚುನಾವಣೆ ಹತ್ತಿರವಾದ ಹಾಗೆ ರಾಜಕೀಯ ನಮ್ಮ ಮನಸ್ಸನ್ನು ಆವರಿಸಿಕೊಳ್ಳುವುದು ಸಾಮಾನ್ಯ. ಆದರೆ ಚುನಾವಣೆಯ ಹೊತ್ತಿನಲ್ಲಿ ಮಾತ್ರ ರಾಜಕೀಯ ವಿಚಾರಗಳು ಜಾಗೃತವಾಗುವುದು ಅಪಾಯಕಾರಿ. ಯಾಕೆಂದರೆ ಉಳಿದ ಹೊತ್ತಿನಲ್ಲಿ ಎಚ್ಚರಿಕೆಯಿಂದ ರಾಜಕೀಯ ಆಗುಹೋಗುಗಳನ್ನು ಗಮನಿಸದೇ ಇದ್ದರೆ, ಪ್ರತಿಕ್ರಯಿಸದೇ ಉಳಿದರೆ ಚುನಾವಣೆಯ ಹೊತ್ತಿನಲ್ಲಿ ಗೊಂದಲಕ್ಕೆ ಒಳಗಾಗಿ ಪಕ್ಷಗಳ ಸುಳ್ಳು ಮೋಸಗಳಿಗೆ ಬಲಿಯಾಗುವುದನ್ನು ತಪ್ಪಿಸಲಾಗದು.

ರಾಜಕೀಯದಿಂದ ನಮ್ಮನ್ನು ವಿಮುಖಗೊಳಿಸುವ ಹುನ್ನಾರ ಸದಾ ನಡೆಯುತ್ತಲೇ ಇರುತ್ತದೆ. ಇದರಿಂದ ಲಾಭವಾಗುವ ಸಮಾಜದ ಹಲವಾರು ಅಂಗಗಳನ್ನು ನಾವು ಗುರುತಿಸಬಹುದು. ಆದರೆ ಪ್ರಸ್ತುತ ಸಂಗತಿ ಅದಲ್ಲ. Continue reading “ಯಾರು ಹಿತವರು ನಿನಗೆ…”